UZ DAN KADA JE ROĐEN VELIKI PJESNIK – Gordan K. Čampar

…uz dan kada je rođen veliki pjesnik…

Gordan K. Čampar                                                                                        PJESNIK

Biću ja tu blizu, na domak huma
čekaću onu kišu prolećnu
koju smo iščekivali željno
i naručiću ono vino „blijedo“
kako si ga nekad zvati znao.

Staviću šešir, ogrnuću kapot
da hladno ne bude
bar  neko vrijeme,
bar na jedan, jedini tren.

Nijesi ti bio majstor da popravljaš svijet
ti si odmah znao da si pravi pjesnik
to je tebi šapnulo zvjezdano nebo
a ti slijepo, slijepo povjerovao u to.

A sada, ti mi samo reci
kako se to anđeli sa zorom svađaju,
da li bar slično onom
kako su ti to često činiti znao.
Stanuješ li gore u kupeu
ili ti je oblak poklonio jastuk.

Kako se gore ispija noć
riječ po riječ, ili kap po kap,
kako se tamo mjeri vrijeme
i da li postoji pješčani sat.

Reci mi, da li ti je makar,
makar malo bolje;
nego ovdje što je bilo, Dule.